Hər oyunda 1 ithaf - Şəhər günləri!

“Səbail” Peşəkar Futbol Klubunun Misli Premyer Liqasının 2023/2024-cü illər mövsümün başlanması ilə yeni layihəyə start verməsi barədə məlumat vermişdik. Cari mövsümdə klubumuzun keçirdiyi hər ev oyunu ölkəmizin tarixi, görkəmli şəxsiyyətləri, mədəniyyət və incəsənəti ilə bağlı əlamətdar günlərə, həmçinin beynəlxalq səviyyədə qeyd olunan müəyyən tədbirlərə həsr olunmaqdadır. Beləliklə, Misli Premyer Liqasının 10-cu turu çərçivəsində oktyabrın 20-də, saat 20:30-da, “ASCO Arena”da keçiriləcək “Səbail” - “Neftçi” oyunu Cəbrayıl, Qubadlı, Füzuli və Zəngilan rayonlarının 3 il öncə oktyabr ayında rəşadətli ordumuz tərəfindən düşmən işğalından azad edilməsinə həsr olunacaq. İşğaldan azad edilmiş əraziləri üzrə şəhər günlərinin təsis edilməsi haqqında Azərbaycan Respublikasının Prezidenti İlham Əliyev tərəfindən imzalanmış 31 iyul 2023-cü il tarixli Sərəncama uyğun olaraq 4 oktyabr – Cəbrayıl şəhəri günü, 17 oktyabr – Füzuli şəhəri günü, 20 oktyabr – Zəngilan şəhəri günü, 25 oktyabr – Qubadlı şəhəri günü olaraq qeyd edilir.