"Səbail" "Dinamo"ya qalib gəlib

Azərbaycan Kubokunun II təsnifat mərhələsinin oyunları keçirilib. Komandamız sözügedən mərhələdə  "Dinamo" ilə üz-üzə gəlib. "ASCO Arena"da baş tutan qarşılaşmada "Səbail" ilk dəqiqələrdən oyunda üstünlüyü ələ keçirib. Matçda hesab 22-ci dəqiqədə açılıb. Oruc Məmmədovun qolu ilə "dənizçilər" önə keçib. 2 dəqiqə sonra Vüsal Məsimov üstünlüyü iki topa çatdırıb. 39-cu dəqiqədə Gülağa Əsədovun qolu ilə Şahin Diniyevin yetirmələri fasiləyə 3:0 irəlidə girməyi bacarıb. İkinci hissəyə də komandamız daha yaxşı başlayıb. Görüşün 57-ci dəqiqəsində Gülağa Əsədov özünün 2-ci, komandamızın 4-cü qoluna imza atıb. 66-cı dəqiqədə Ayman Boualinin qolu ilə hesab arasındakı fərq 5 topa çatıb. Oyunda yekun nöqtəni 82-ci dəqiqədə Fərid Şahhüseynni qoyub. Beləliklə, komandamız "Dinamo" üzərində 6:0 hesabı ilə qələbə qazanaraq adını Azərbaycan Kubokunun 1/8 final mərhələsinə yazdırmağı bacarıb.