“Səbail” PFK yoxlama oyununda heç-heçə edib

Misli Premyer Liqasının 2023-2024-cü il mövsümünün ikinci yarısı üçün hazırlığını Antalyada davam etdirən “Səbail” PFK ilk yoxlama oyununu keçirib. Şahin Diniyevin rəhbərlik etdiyi kollektiv Rumıniya Superliqa təmsilçisi “Universitatea Cluj”la qarşılaşıb. “İS Santai Hotel”inin meydançasında baş tutan qarşılaşma 0:0 hesabı ilə başa çatıb.

Qeyd edək ki, yanvarın 5-dən Antalyada təlim-məşq toplanışında olan “Səbail” Türkiyədə ikinci yoxlama matçını yanvarın 15-də Rusiya Premyer Liqa təmsilçisi “Fakel”ə qarşı keçirəcək. Görüş başa çatdıqdan sonra komandamızın baş məşqçisi Şahin Diniyev oyun haqqında fikirlərini bildirib: “Yanvarın 5-dən başlayaraq gündə iki dəfə olmaqla Antalyada təlim-məşq toplanışımız davam edir. Plana əsasən, bu gün Türkiyədə ilk yoxlama oyunumuzu keçirdik. Bu qarşılaşmada mənim üçün nəticə önəmli deyildi, əsas komandamın ağır məşqlərdən sonra funksional hazırlığını izləmək idi. Zədəli futbolçularımızın çox olması işimizi çətinləşdirsə də, bu oyunda uşaqla yorğunluq fonunda əsl xarakter nümayiş etdirdi. Futbolçular Rumıniya yüksək dəstə komandasına qarşı həm taktiki, həm texniki cəhətdən çox ağıllı oynadı. Bu qarşılaşma ilə bir daha düz yolda olduğumuzu gördük. Hər bir futbolçuma bu ağır oyunda tempi sona qədər saxladıqları üçün əzmkar mübarizəyə görə təşəkkür edirəm”.   

Yoxalama oyunu / Antalya

“Səbail” - “Universitatea Cluj” (Rumıniya) 0:0